Sämikielâ (saamen kieli)

Kielâ lii ohtâ tehálumosijn kulttuuräärbi oosijn. Kielah čäittih identiteet já čaneh sárnoid jieijâs siärvádâhân, jieijâs moonnâmááigán, tááláá ááigán sehe puátteevuotân. Kulttuur kulloo kielâin, toid lii čonnum valjeest tiäđuid maailmist já olmooškode vuáttámušâin. Ko lii saahâ sämikielâst, te ij uáivilduu tuše ohtâ kielâ. Sämikielâhäämih láá ohtsis love, main oovce sárnoo ain-uv Suomâ, Ruotâ, Taažâ já Ruošâ kuávluin. Tain Suomâst sárnuh kuulmâs: anarâškielâ, nuorttâlâškielâ já tavesämikielâ. Sämikielah láá Euroop algâkielah, moh kuleh syemmilâš-ugrilâš kielâjuávkun. Sämikielah láá nuorttâmeerâsyemmilâš kielâi tegu suomâkielâ já eestikielâ kaaidâs hyelkkikielah. Sämikielâin já suomâkielâst lii lamaš ohtsis vuáđukielâ. Kielah láá sierânâm suulân 3000-3500 ihheed tassaaš.