Ärbipurrâmuš (perinneruoka)

Sämmilâš ärbipurrâmuš lii ennuv eres-uv ko poccuusteikkâ lasattâsâiguin. Sämmilâš purrâmâšválju lii šoddâm eennâm adalduvâin, moh láá ärbivuáválávt ain kevttum eennâm kyeddimnaavcâ raajij siste. Sämmilij algâaalmugkulttuur lii tovláá rääjist kiävttám šaddoid, elleid, kuolijd já luudijd, moh kuávlust jo šaddeh jiešmeidlist ulmuu mietivaikuttâsâittáá. Nubenáál ettum sämmiliih láá kiävttám puoh tom, maid luándu jieš jyehi ive šoddâd ulmuu kevttimnáál jo-uv njuolgist tâi epinjuolgist. Tastko tuodâr- já vyevdiräjikuávlu luándu jyehi-ivvááš šoddâm lii tuš 1/10–1/20 kuácceevyevdikuávlu šoddâmist, te sämikulttuur mield ellee ulmuuh láá tarbâšâm stuárráb kuávluid iäláttâsâi várás. Tággáár sämmilij purrâmuškuudij já siijdâi vijđes kuávlui ekstensiivlii eennâmkevttim lii kuittâg vuáđudum oles kuávlu tärhis kiävtun kuávlu luándu já pyevtittâs miäldásávt. Ärbivuáváliih iäláttâsah láá vuáđudum enâmij já resursij kiävtun já tai kiävttuvuovij oovtmanolii ovdánmân, mii lii lamaš eellimiähtu vättee já korrâ tiilijn. Taat syeijee, huolâtteijee koskâvuotâ enâmân, eletteijei, lii lamaš puoh sämmilâš siärvádâhân kyeskee njuolgâdusâi, siättusij, laavâi, vuáháduvâi já tooimâi vuáđđun.