Pase sajeh

Pase saje lii tile, kuávlu tâi čuosâttâh, mii annoo eromâš merhâšitten, kunnijâtten tâi kuoskâmettumin oskolduvlij, jiegâlij, kulttuurlij tâi persovnlij suujâi keežild. Pase sajeh lohtâseh távjá immeelvuotân, pase muštâlussáid, ärbivuovvijd, luándun tâi siärváduv historján, já toh iäráneh argâpeeivi pirrâsist eromâš árvuinis.

Pase sajeh láá sämikulttuurist jiegâlávt, historjálávt já kulttuurlávt merhâšittee luándu- tâi huksejum sajeh, tego uhredemsajeh (sieidi, sieidebáiki, sieidipäikki, palvvpäiʹǩǩ), tiätu tuoddâreh, käldeeh, čácáduvah já/tâi enâduvah. Toh čäittih sämmilii maailmkove, oskomušâid já ärbivuovijd, já toi árvu vuáđuduvá siärváduv jieijâs ibárdâsân já miäruštâlmân.

Pase sajeh iä lah rijjâ mađhâšeijei juksâmnáál iäge rijjâ mađhâšem kiävtust, peic toi máhđulâš oovdânpyehtim tâi tain kollim váátá kulttuur haldâšeijei mieđettem sosiaallii já kulttuurlii toimâlove (Social License to Operate, Cultural Licence to Operate) sehe FPIC-prinsiip (Free, Prior and Informed Consent) miäldásii miettâm. Jieškote-uv pase saje kulttuur haldâšeijeeh merideh, ete kiäs, kuás já moi iävtuiguin saje puáhtá čäittiđ tâi saajeest puáhtá muštâliđ, já ete toimâ olášuttoo vuovvijn, mii siäilut saje kunnijâttem, kuoskâmettumvuođâ já merhâšume.