Bassi báikkit

Bassi báiki lea sadji, guovlu dahje báiki, mii vásihuvvo leat erenomáš mearkkašahtti, árvvusadnojuvvon dahje guoskameahttun oskkoldaga, vuoiŋŋalašvuođa, kultuvrra dahje persovnnalaš sivaid geažil. Bassi báikkit laktásit dávjá ipmilvuhtii, bassi muitalusaide, árbevirolaš, luonddu dahje servoša historjái, ja dat earránit árgga birrasis daid erenomáš árvvuin.

Bassi báikkit leat sámekultuvrras vuoiŋŋalaččat, historjjálaččat ja kultuvrralaččat mearkkašahtti luonddu- dahje huksejuvvon čuozáhagat, dego bálvvosbáikkit (sieidi, sieidebákkit, sieidipäikki, palvvpäiʹǩǩ, uhripaikka), dihto duoddarat, gáldut, čázádagat ja/dahje duovdagat. Dat ovdanbuktet sámi máilmmigova, oskumušaid ja árbevieruid, ja daid árvu vuođđuduvvá servoša iežas áddejupmái ja meroštallamii.

Bassi báikkit eai leat friija mátkkálaččaid olámuttos eaige friija mátkeealáhusa ávkin, muhto daid vejolaš ovdanbuktin dahje dain galledeapmi eaktuda kultuvrra hálddašeaddjiid mieđihan sosiálalaš ja kultuvrralaš doaibmalobi (Social License to Operate, Cultural Licence to Operate) ja FPIC-prinsihpa (Free, Prior and Informed Consent) mielde miehtama. Guđege bassi báikki kultuvrra hálddašeaddjit mearridit, geasa, goas ja maiguin eavttuiguin báikki sáhttá čájehit dahje báikkis sáhttá muitalit, ja ahte doaibma ollašuhtto vugiin, mii seailluha báikki árvvusatnima, guoskameahttunvuođa ja mearkkašumi.