Sääʹmkulttuur

Sääʹmkulttuuʹre koʹlle jeäʹrbi mieʹldd sääʹmǩiõll, sääʹm kulttuuräʹrbb, kulttuurõõlmtõõzz, sääʹmčeäppõs, säʹmmlai äʹrbbvuõđlaž teâtt, sääʹm luâttkõskkvuõtt, äʹrbbvuõđla sääʹmjieʹllemvueʹjj da tõi ânnʼjõžäiggsaž harjjtummuž hääʹm seämmanalla ko jeeʹres säʹmmlai alggmeeran harjjtem kulttuur nääʹl da hääʹm. Tõnnalla ouddmiârkkân sääʹmǩiõll, mainnâz, musikk di sääʹmkulttuur jäänmõsân kuâsttjeei symbool mâʹte sääʹmpihttâz da sääʹmǩiõtt-tuâj lie ǩiiddâs õhttvuõđâst jeäʹrbi mieʹldd äʹrbbvuõđlaž jieʹllemvuõʹjjid šõõddeeʹl jeärteǩani obbvuõđ, koon juõʹǩǩ vueʹss-sueʹrǧǧ taarbaš nuuʹbb, što tõt seeilči jieʹllemviõkksiʹžžen, vueiʹtlvââʹsteeʹl sääʹmkulttuur seillmõõžž, ouddnummuž da serddmõõžž pueʹtti puõlvvõõǥǥid. Jõs ouddmiârkkân õhtt kulttuur vueʹss-suõʹrjin läppai leʹbe tõn toiʹmmjemvuʹvdd rääʹjtââvv, tåbddje täk vaaiktõõzz tâʹlles nuuʹbb åʹrnn.