Disinformaatio da misinformaatio

Tän peeiʹv teâtt-tuuʹlvest vuäitt leeʹd väʹǯǯel vuâmmšed  tuõđlaž teâđ puäst teâđast. Disinformaatio miârkkšââvv jääutai da teâđsteeʹl liâvtum puäst teâđ. Misinformaatio peäʹlstes viiʹttai vuâmmšekâni leʹbe tieʹđǩani uvddum da liâvtum puäst, vännsallaž leʹbe pååʹmhallaž tiõttu. Säʹmmlain tieʹđet occanj. Vääʹldeeʹl lokku juʹn vaalmâš takai tieʹđǩaʹnesvuõđ kuõskeeʹl säʹmmlaid, siʹjji historia da kulttuur, dis- da misinformaatio lââʹzzte õinn säʹmmlaid kuõskki vännai da puäst teâđ da tuärjjee hääitlaž mõõntõõllmõõžžid, kookk neeuʹrte sääʹmõutstõõzz pueʹrrvââjjmõõžž da sääʹmkulttuur seillmõõžž jieʹllemviõkksen, jieʹllʼjen dynaamlaž kulttuurân. Pueʹrr lij še teâđsted, što puäst teâđ da puäst koov uʹvddmest vuäiʹtte leeʹd aʹrvveeǩaʹnes veeidas vaaiktõõzz, kookk kuõskte Lääʹddjânnmest jälsteei säʹmmlai lââʹssen še riikk raaʹji pâʹjjel Ruõccjânnam, Taarrjânnam da Ruõššjânnam peäʹlnn jälsteei säʹmmlai kulttuur da kulttuursaž vuõiggâdvuõđid. Vasttõsvuõđlaž turistt tobdstââtt säʹmmlaid da sij kulttuuʹre õuʹddel ko puätt säʹmmlai dommvoudda leʹbe Sääʹmjânnma äuʹǩǩeeʹl oskkum teâttkääivaid.