Puáttee suhâpuolvah (tulevat sukupolvet)

Säämist tun lah kyessin pääihist, kost sämmilij argâ já juhle láá uási mávsulâš ellee kulttuurhäämist, mii hämmee eromâš kulttuurenâduv já lii sämmilij toovláš päikki. Taan ellee kulttuurenâduvâst máhđulistoo sämikulttuur eellimvuáimálâšvuotâ já puáttee suhâpuolváid sirdem. Mist juáhháást lii ovdâsvástádâs mii ohtsii puátteevuođâst jyehi saajeest, kuus mii tavoi já laavhij čuávumušah ulâtteh. Toohâp oovtâst taan ääigist eenâb ovdâsvástádâslâš já eettisávt kilelub, vâi ittáá suhâpuolvâin lii puoh taat muččâdvuotâ já rigesvuotâ eellimnáál já feerimnáál.

Jis ij lah ohtsâš ibárdâs sämikulttuur já toos čovgâ kullee luándu mittedmettum áárvust já ton jiegâlii äärbi rigesvuođâst já puoh taan siäilum tehálâšvuođâst, te Laapi tehálumoseh mađhâšemhiäđuh sättih hiäjusmuđ. Sämmilij päikkikuávlu mađhâšemhiäđuh láá ei. putes luándu, sämikulttuur já ärbivuáváliih iäláttâsah tego puásuituálu.

Ärbivuáválâš tiätu lii luándus peeleest njálmálâš, vuáttámušâin šaddee mättimtiätu, mii lii čoggâšum maaŋgâi suhâpuolvâi ääigi já siäilum uđđâ suhâpuolváid. Sämmiliih láá suhâpuolvâst nuubán siäiluttâm ärbivuáválâš tiäđus jieijâs eellimvyevist já áigápuáđu hahâmist ärbivuáválâš iäláttâsâin. Sämikulttuurist, ärbivuáválâš iäláttâsâin, kietâtuojijn já eellimvyevist láá amnâseh, moh láá siäilum maddârijn taan ááigán tego ovdâmerkkân puásuituáluvyevih, pivdovyevih, kielâ, päikkinoomah teikâ ärbivuáválâš iäláttâsâin já kietâtuojijn kevttimnáál piergâseh. Veikâ sämi-iäláttâssáid já kietâtuojijd láá puáttám uđđâ pargovuovijd, te vuáđđun tain láá oovdeb suhâpuolvâin ärbejum tiäđuh já tááiđuh. Lii tehálâš turviđ hinnáid paijeentoollâđ já ovdediđ sehe sirdeđ puáttee suhâpuolváid sämmilij jieijâs kulttuur, toos kullee ärbivuáválâš iäláttâsâid já ärbivuáválâš tiäđu sehe sämmilij maailm kovvejeijee sämikielâ.