Sämimađhâšem

Sämimađhâšem iberduvvoo maađhâšmin, mast sämikulttuur naavcâid anemáin pyevtitteh mađhâšempalvâlusâid já fäälih taid finnodâhtoimâlij agâiguin. Sämimađhâšem kolgâččij leđe sämmilâšvuotân vuáđuduvvee mađhâšem, mast sämisiärváduv siste puátteeh tuáimih mađhâšemiäláttâs hárjutteijen. Eromâšávt Laapist lii meid mađhâšem, mii ávhástâl sämmilâšvuođáin já mast sämmilâšsiärváduv ulguubeln puáttee mađhâšemsyergi hárjutteijeeh já eres mađhâšemtuáimeeh aneh já ávhástâleh sämikulttuurân lohtâseijee tâi čujotteijee elementijguin mađhâšempalvâlusâin nuuvt, ete ij lah tuođâlii ohtâvuotâ sämisiärvádâhân. Maŋgii sämmilâšvuođáin ávhástellee mađhâšem lii sämmilijd luávkkejeijee, mis- já disinformaatio sirdee stereotypiai nanodem, mast ij lah sämmilij jieijâs jienâ ige uáinu.