Lávvu

Lávvu (láávu, kååvas, laavu) gullá sámi árbevirolaš ássanhámiide: čohkolas ja sirddihahtti gaskaboddosašássamuš, mii lea árbevirolaččat geavahuvvon erenomážit johtti boazodoalus duottarguovlluin. Lávvorikki hábmejit golbma váldomuora dahjege guoddi válddahaga (váldâttuvâh, väʹlddmuõrr, laavupuu) ja  lávvomuorat (lávumuorâ/lávuruođa, kååvasruõđ, laavupuut). Riggi gokčojuvvo loavdagiin (loovdâ, värjj, loude). Geasset loavddan sáhttá geavahit geahppasut gággása (fárju, várju, värjj). Lávu guovdu lea árran, ja lávvomuorat leat ruossut bajožis.

Lávu lea álki cegget ja burgit. Das lea geahppa ráhkadus ja dan lea álki sirdit. Válddáhagat eai álo fievrriduvvo mielde, muhto daid sáhttá guođđit dávjá geavahuvvon ceggensadjái vuordit čuovvovaš geavahangearddi. Dárbbu mielde ođđa lávvomuoraid lea viehka johtil ja álki ráhkadit báikki alde.

Lávvu oaivvilda eará áššiid suomagillii ja sámegillii, mii sáhttá dagahit boasttoipmárdusaid. Suomagielas tearpma lávvu čujuha dábálaččat rabas vuoiŋŋastansadjái dahje dolastallansuodjái, mas leat golbma seainni ja gáhttu. Dasa lassin suomagielas hállojuvvo dávjá goađi birra, go oaivvildit sápmelaš lávu. Lávvu earrána goađis ovddemustá rikki ráhkadusa oasil. Lávus eai leat goahtebealjit ja lávvomuorat leat oktageardánabbot. Sápmelaš lávvu gullá sápmelaččaid kulturárbái, árbevirolaš huksenárbái ja eallinvuohkái.

Vásttolaš ja ehtalaččat suvdilis sámemátkeealáhusas lea dehálaš geavahit rivttes namaid ja earuhit lávu kultuvrralaš mearkkašumi. Dárkilis ja diđolaš giellageavahus veahkeha sihkkarastit, ahte árbevierru ja kultuvrralaš duogáš bohtet ovdan rivttes vugiin.