Pääkklaž kriteeʹr

Vaʹstteemvuõđlaž da eettlânji ǩeâllʼjeei sääʹmturismmpõõrǥâs puätt saaʹmi seʹst. Põõrǥâs äuʹǩǩad sääʹmkulttuur viõkkvääraid vaʹstteemvuõđlanji da eettlânji ǩeâllʼjeeinalla puuʹtʼteeʹl turismmkääzzkõõzzid da taʹrjjeeʹl tõiʹd jäärnaǩtååimlaž vuâđain. Sääʹmturismmkääzzkõõzzi âlgg vuâđđõõvvâd tuõtt tiõttu säʹmmlain da sääʹmkulttuurâst. Turismmouddaz sääʹmvuõđ staanâm diõtt sääʹmturismmkääzzkõõzz âʹlǧǧe vuâđđõõvvâd säʹmmlaid da sääʹmkulttuur kuõskki tuõtt tiõttu. Vaʹstteemvuõđlaž da eettlânji ǩeâllʼjeei sääʹmvuõʹtte vuâđđõõvvi turiismin staanât tuõđmeâldlaž da puuʹttes toobdâlm da jeäʹlstõõzz turiʹstte, kåått oudd äärv vaʹstteemvuõʹtte da eettlaž ǩeâllʼjemvuõʹtte. Põrggsest âʹlǧǧe leeʹd toiʹmmjummšes meâldlaž lååʹv da tõn âlgg jääʹǩǩted põõrǥâståimma kuulli laaʹjjid da meärrõõzzid. Lââʹssen sääʹmturiismâst põõrǥâs âlgg väʹldded lokku toiʹmmjummšes vaaiktõõzzid toiʹmmjemvuuʹdes sääʹmõutstõʹsse, põrggâz toiʹmmjempirrõʹsse di sääʹmkulttuuʹre da tõn seillma, õõuʹdummša da luândlaž seʹrddemvueiʹttemvuõđid pueʹtti puõlvvõõǥǥid.

Sääʹmturismmpõõrǥâs väldd lokku jiiʹjjes sääʹmõutstõõzz da põrggses toiʹmmjemvuuʹd õutstõõzzi taarbid, vuäinnmõõžžid da peʹccelaaʹššid. Lââʹssen âlgg väʹldded lokku põrggâz harjjtem turiismâst šõddi muttsi vaaiktõõzzid õutstõõzz pueʹrrvââjjma. Turismm ij õõlǥči vaaikted negatiivlânji pääiklaž sääʹmõutstõõzz leʹbe tõn vuäzzlai aʹrǧǧe leʹbe juuhlid jieʹlli kulttuurkueʹstlmest. Põrggsest âlgg leeʹd toimmjummša sosiaalʼlaž

Õhtt sääʹmvuõʹtte vuâđđõõvvi turiism tääʹrǩmõs tuâjain lij suõjjled da tuõʹllʼjed sääʹmkulttuur da tuärjjeed tõn serddmõõžž pueʹtti puõlvvõõǥǥid. Turiismâst sääʹmkulttuur äuʹǩǩeei ouddaz da kääzzkõõzz âʹlǧǧe vuâđđõõvvâd tuõtt tiõttu, kookk vueʹlǧǧe põrggâz jiiʹjjes tuõtt sääʹmkulttuurâst. Ouddsen raajjmõš kaiʹbbai ouddsen rajjum kulttuur raavâs fiʹttjummuž. Ouddsen raajjmõš da kääzzkõõzzi õõudâsviikkmõš âlgg tuejjeed sääʹmõutstõõzz kulttuursaž äärvai da vuäinnmõõžži meâldlânji. Sääʹmkulttuur kaauplaž äuʹǩǩummša âlgg leeʹd õutstõõzz sååvšummuš leʹbe kulttuursaž tåimmlååʹpp. Nuʹtt še kulttuursaž ǩiõrddâmvuõđ raajid âlgg väʹldded lokku põrggâz toiʹmmjummšest.

Sääʹm turismmpõõrǥâs âlgg toiʹmmjed da šiõttlõõvvâd toiʹmmjemvouddses nuʹtt, što rââʹžžes, aarktlaž jieʹlli kulttuurkueʹstelm seill še pueʹtti puõlvvõõǥǥid pueʹrmõõzz mieʹldd määŋghämmsen. Sääʹm äärvai, juʹrddemnaaʹli da äʹrbbvuõđlaž jieʹllemnääʹl mieʹldd luâtt âlgg seeilted da ââʹnned nuʹtt, što tõt jeäʹlat oummuid da oudd piʹrǧǧeemvuõđ, kååʹtt miârkkšââvv, što luâđast vääʹldet tåʹlǩ tõn mâiʹd taarbšet ij-ǥa ni mõõnn jeänab nuʹtt, što luâđ ǩiõrddâmvuõtt seeilči še pueʹtti puõlvvõõǥǥid.

Tällõõzzlaž ǩeâllʼjemvuõtt teädd pääiklažtäälai tuärjjummšest õutstõs- da õõutjõs tääʹzzest. Tällõõzzlaž ǩeâllʼjemvuõđ vueʹlǧǧemsââʹjjen lij, što turismmpuåttjin jäänmõs kuâđđai voudda. Tän vueiʹtet tuejjeed uuʹdeeʹl tuâj saaʹmid di pääiklaž põõrǥâstååimain. Tällõõzzlaž ǩeâllʼjemvuõʹtte kooll õuddmiârkkân âʹlddporrmõõžž siâssmõš di sääʹmouddsi, mâʹte sääʹm ǩiõtt-tuâjai da pääiklaž sääʹmkääzzkõõzzi âânnmõš. Tällõõzzlaž ǩeâllʼjemvuõđ täävtõsân lij turismmjieʹllemvueʹjj integrõõvvmõš sääʹmõutstõʹsse nuʹtt, što tõʹst pueʹtti tällõõzzlaž äuʹǩǩ juâkkjõõvče voudda veiddsõmâs mieʹldd. Samai tääʹrǩes äʹšš lij še tõt, što vooʹps turiism åålǥpeäʹlnn åårrai sääʹmõutstõs tåbdd turiism positiivliʹžžen da õutstõõzz äuʹǩǩeei tåimman di viõkkväärran. Turismm âlgg še tuärjjeed sääʹm äʹrbbvuõđlaž jieʹllemvuõʹjjid, što tõt leʹčči tällõõzzlânji ǩeâllʼjeei. Täällõõzzlaž ǩiõrddâmvuõtt meäʹrtââll maksimaalʼlaž turismmtååimai leʹbe turiisti meäʹr, õuʹddel ǥu pääiklažoummui jieʹllmest šâdd leigga kaallšen jieʹlled leʹbe toiʹmmjed jiiʹjjes vuuʹdest

Vaʹstteemvuõtt da eettlaž ǩeâllʼjemvuõtt âlgg kuullâd põrggâz puk siiʹsǩpeäʹl da åålǥpeäʹl saaǥǥtummša di põrggâz bräänd raajjma da tuõʹllʼjummša. Saaǥǥteeʹl veiddsânji põrggâz vaʹstteemvuõđâst da eettlaž ǩeâllʼjemvuõđâst põõrǥâs hiâlpad kueʹss tuejjeed teâđstum, õutstõõzz äuʹǩǩeei vaʹlljummšid. Kuõʹssin lij haall tobdstõõttâd sääʹmkulttuuʹre da mättjed ođđ aaʹššid kueʹssjem ääiʹj. Tõn diõtt lij täʹrǩǩ smiõttâd, mäʹhtt ainsmââʹttet, što tät ooʹnnast vaʹstteemvuõđlaž, eettlânji ǩeâllʼjeei da õutstõõzz priimmâm naaʹlin. Sääʹmõutstõõzz åålǥpeällsa turismmsueʹrj da turiist jie tääuʹjmõsân vueiʹt räʹtǩǩed tuõtt sääʹmouddaz panntuõđâst. Vaʹstteemvuõđlaž da eettlânji ǩeâllʼjeei sääʹmturiismâst lij tääʹrǩes rool tuõđmeâldlaž sääʹmkoov liâvtummšest nuʹtt Lääʹddjânnmest ǥu pirr maaiʹlm.