Jeeʹrab kriteeʹr

Porrmõš kooll kõskksâjjsen turismmkääzzkõõzzid da porrmõšjeäʹlstõõzz lie äʹššniiʹǩǩid jõnn vueʹssen mäʹtǩǩtobdlmest. Porrmõšooudas lij õhtt nääʹll čuäʹjted kueʹssid sääʹmkulttuur. Samai täʹrǩǩ lij väʹldded lokku da taarb mieʹldd priorisâʹstted õutstõõzz porrmõš-staan riʹjttjummuž da vuäǯǯamvuõđ. Õhttsažtuâjj porrmõšturiismâst âlgg leeʹd pukid vueʹsspieʹlid äuʹǩǩeei. Kudd porrmõšooudas lââʹzzat turismmvuuʹd ǩieʹssemviõǥǥ da lij šiõǥǥ nääʹll lââʹzzted kulttuursiiskõõzz vuuʹd peeivlaž aktivitetta. Porrmõõžž tuʹššummuš âlgg minimâʹstted.

Puäʒʒ lij õhtt pââimõs sääʹmkulttuur vuâđđaunnsin di turiismâst tääʹrǩmõs ǩieʹssituejjeeʹjin säʹmmlai dommvuuʹdest da veezz puäʒʒhåiddamvuuʹd. Puäʒʒturiʹsmme looǥǥât puäʒʒtääll- da čiõǥǥârkueʹssjummšid, vuejjampuõccuid di kääʹddespuõccuid. Puäʒʒturiism vueʹlǧǧemsââʹjjen âlgg leeʹd puõccu pueʹrrvââjjmõš. Puäʒʒ turismmtuâjjliʹžžen taarbaš nokk vuâŋŋmõõžž di rääuh kuõʹssin. Turismmpuõccu ǩiõttʼtõõlli âlgg leeʹd mättjam puõccuid da tõi håiddma.