Šiõttlõõvvmõš

Säʹmmla jie leäkku põrggâm muʹtted luâđ, tõn sâjja sij lie šiõttlõõvvâm tõõzz. Säʹmmlaid da siʹjji äʹrbbvuõđlaž jieʹllemvuõʹjji harjjtummša jieʹllem-mäinnan čõõđ aaiʹji lij leämmaž luâđ ǩeâllʼjeei âânnmõš, luâtt da mädd lie leämmaž säʹmmlai jeäʹlteeʹjen. Sääʹm jieʹllemnääʹll lij šiõttlõõvvâm luâttpirrõõzz uʹvddem vueiʹttemvuõđid da rajjtõõzzid dohti iiʹjji ääiʹj. Sääʹm jieʹllemnääʹll, kulttuur da äʹrbbvuõđlaž jieʹllemvueʹjj lie mottjam äʹrbbvuõđlaž teâđ da tääid vuâđald tõn mieʹldd ko tuâjjnääʹl da tuâjjneävv lie puârrnam di säʹmmlai õhttsažkååddlaž vaaiktemvueiʹttemvuõđ lie mottjam ääiʹj mieʹldd. Sääʹm kulttuur seillmõš da õuddnummuš kaiʹbbje še ânnʼjõõžžâst äʹrbbvuõđlaž teâđai da tääidai di jiõgglaž jällmõõžž serddjummuž pueʹtti puõlvvõõǥǥid.