Seuʹrrjemriâšldõk

Seuʹrrjemriâšldõk miârkkšââvv jiârǥlaž nääʹl noorrâd, ruõkkâd, analysâʹstted da raportâʹstted teâđ toiʹmmjem, eettmõõžž leʹbe täävtõõzzi õuddnummšest. Tõn veäkka vueiʹtet taʹrǩstõõllâd, mäʹhtt šiõttuum täävtõõzz teâuddje, vuâmmšed muttsid, ärvvtõõllâd tååimai vaaiktemvuõđ da tobdsted vueiʹtlvaž vaiggâdvuõđid ääiʹjstes. Seuʹrrjemriâšldõʹǩǩe kooll takainalla mieʹrrkõskksaž da snäätnas teâttnoorrmõš, suåppum metteemneävv (indikaattoor), analyys da veʹrddõõllmõš, raportâsttmõš di kookkasǩiõčči juätkkjemvuõtt. Tõin raajât vuâđ tuʹmmstõktuõjju da tååim õõudummša.

Vaʹstteemvuõđlaž sääʹmturiism sertifikaʹtte da Sääʹmturiism jieʹlli kulttuurkueʹstelm plaaʹne (SMEKS) kuulli seuʹrrjemriâšldõk lij tuâjjneävv, koin ärvvtõõlât turismmtååim vaaiktõõzzid kulttuuʹre, pirrõʹsse, õõutstõʹsse da tällõʹsse. Riâšldõk vuäitt ââʹnned seʹst mettneävvaid õuddmiârkkân kulttuurääʹrb seillmõõžžâst, õõutstõõzz vuässâttmõõžžâst, turisttmeäʹrin da tõi vaaldšummšest tiõttum vuuʹdin da tiõttum ääiʹjpooddin (aainâs hot spot-paaiʹǩin  leʹbe vaʹǯǯlõs vuuʹdin väʹlddsesooŋ ääiʹj), pirrõsvaaiktõõzzin da pääiklažõutstõõzz vuäǯǯam tällõõzzlaž ääuʹǩest. Tõt vuâđđââvv kaʹtti da määŋghämmsaž teâttnoorrma, čõõđ kuâsttjeei teâttvaajtummša di vuârrsaǥstõõllmõʹšše kulttuur vaaldšeeʹjivuiʹm, nuʹtt što sij vuäinnmõõžžid da ǩiõččlâsttmõõžžid vääʹldet lokku eettlânji ǩeâllʼjeeinalla. Seuʹrrjemriâšldõõǥǥ veäkka ainsmââʹttet, što turismm tueʹrjjad jieʹlli kulttuurkueʹstelm seillmõõžž, veekk õõudårra õõutstõõzz pueʹrrvââjjmõõžž da vueiʹtlvâstt taarb mieʹldd koʹrjjeei tååimaid, jos turiism kuârmtõs mâân pâʹjjel kulttuursaž, sosiaalʼlaž, ekolooglaž leʹbe tällõõzzlaž kueʹddemviõǥǥ – še põõʹji mieʹldd, õuddmiârkkân vuäʹnkõs leša intensiivlaž sesooŋŋi ääiʹj, kuäʹss måttmid paaiʹǩid vuäitt nårrjed kueʹrmm čuuʹt kõrrsen.