Puuʹttes poostjânnam

Puuʹttes poostaijânnmen ââʹnet nåkam kuâras pääiʹǩ, koon oummu ǩiõtt ij leäkku kuõskkâm leʹbe čâʹlmm ij leäkku vuäinnam. Toʹben ij nääiʹt leäkku ni ǩii leʹbe ni mii, koon leʹbe ǩeän kulttuur leʹbe kulttuurvuõʹjjid âlgg väʹldded lokku. Näkam juʹrddem-maaiʹlm jaukkad pääiklažõutstõõzzid kuestʼteʹmmen jiijjâs dommpirrõõzzâst. Dommpirrõõzzâst, koʹst turiist lie kueʹssen. Lääʹddjânnmest mainstum sääʹmǩiõlin ij leäkku poostaijânnam miârkteei jiijjâs sääʹnn. Turiisti ”poostaijânnam” lij pääiklaž säʹmmlai päiʹǩǩ da mäŋggsid tõt lij še piʹrǧǧummuž da dommtarbbtääl käivv jeeʹres ǥu turiism pääiʹǩ. Håʹt luâđast ij pâi leäkku kuâsttjeei miârkk tõʹst, što toʹben leʹčči jottum, säʹmmlai dommvuuʹdest ij kuuitâǥ kaunnu nåkam päiʹǩǩ, koon säʹmmla jie leʹčči nõõmtam koon-ne eeʹjjpoʹdde kuulli kulttuurčõnnsallaš âânnmõõžž diõtt. Jeeʹres kulttuurin puõʹtti turiisti luâttfiʹttõs vuäitt čårrned samai jiânnai säʹmmlai luâttfiʹttõõzzâst. Tõn määiʹnest lij pueʹrab ooudpeäʹlnn tobdstõõttâd kueʹssjem voudda, tõn luâtt-tuejjeeʹjid da äʹrbbvuõđlaž ââʹnnem-maallid di vuuʹd jeeʹres kulttuurvuõʹjjid. Juõʹǩǩʼka vuõiggâdvuõđ lie šiõǥǥ teäʹdded miõʹlle luâđast liikkeem vaʹstteemvuõđ diõtt, rajjtõssân da kueʹđǩani ǩiõjid.