Puäʒʒ

Puäʒʒ (Rangifer tarandus tarandus) lij pieʹll-lååʹjes sõrvvjieʹlli, kååʹtt puõlvvââvv tuõddârkååʹddest. Puäʒʒ da tõn ruått, meäʹcckåʹdd (Rangifer tarandus fennicus), rätkkje nuuʹbbin sõrvvjieʹllʼjin tõʹst, što nuʹtt njeʹŋŋlõs- ǥu ååʹrespuõccust lie čueʹrv. Puõccui nõõmtõs vaajtââll tõn eeuʹni, ââʹjj, sooǥǥpeäʹl di määŋgai jeeʹres aaʹšši mieʹldd. Njeʹŋŋlõspuõccu kååččat älddan da ååʹrespuõccu sârvvsen. Sââʹrves kõõččat čueʹrveez ǩeeʹmmääiʹj nuuʹbbin saaʹnin rõõkkâm mâŋŋa čâhčča. Kackkum puõccu leʹbe spaaiʹliǩ da jieʹrj sârvvsid mââʹjben da ääld mâŋŋa kueʹddmest mii miârkkšââvv vueʹzzi šõddeem mâŋŋa säʹmmlai dommvuuʹdest vueʹss–ǩieʹssmannust. Puäʒʒ lij šiõttlõõvvâm samai puârast aarktlaž jieʹllempirrõõzz tuejjeeʹjid. Puõccu koʹlle vuäʹmsteeʹji jällmõʹšše. Håʹt säʹmmlai dommvuuʹdest puõccu päʹlǧǧe luâđast, puõccuin lij pâi vuäʹmsteei. Puõccu vuäʹmstummuž meärkat puõccu pellja puäʒʒ- leʹbe peʹlljmiârkin. Jeeʹres ǥu Taarrjânnam da Ruõccjânnam naaʹlin, Lääʹddjânnmest puäʒʒhåidd jieʹllemvueʹǩǩen ij kuul tåʹlǩ säʹmmlaid. Lääʹddjânnmest puäʒʒhåiddlääʹǩǩ ǩeâldd puõccui põõltõõllmõõžž. Aainâs ǩiđđtäʹlvv da ǩiđđ lie kriittlaž ääiʹj puäʒʒhååid peäʹlnn ääldai kueʹddem diõtt.