Nääʹllvuâkksaž lääʹǩǩ

Säʹmmlaid da sij äʹrbbvuõđlaž jieʹllemvuõʹjji harjjtummša jieʹllem-mäinnan lij čõõđ aaiʹji leämmaž luâđ ǩeâllʼjeei âânnmõš, luâtt da mädd lie leämmaž säʹmmlai jeäʹlteeʹjen. Sääʹm luâđ määŋglaaǥǥanvuõʹtte kuulli nääʹllvuâkksaž lääʹǩǩ oʹhjjad äʹrbbvuõđlaž mäddâânnmõõžž, õutstõõzz siisklaž kõskkvuõđid mäddââʹnnma kuuleeʹl, rääjj vuâđđjurddjid ââʹnnemvuuʹdid da oʹhjjad luâttresuursi äuʹǩǩummuž ǩeâllʼjeeinalla sääʹm vuõiggâdvuõttfiʹttjõõzz meâldlânji. Säʹmmlain lij leämmaž čõõđ aaiʹji nääʹllen uussâd luâmmnid čõhččǩeässa da saaʹmin leäi sääʹnteʹmes suåppmõš, koon  pääiʹǩest da koonn lueʹmjieʹǧǧest kååʹtt-a piâr luâmmnid uuzzi. Seämma sääʹnteʹmes suåppmõš, koonn sääʹm ciʹsttje, kuõski kueʹllšeeʹllempaaiʹǩid, reppšeeʹllempaaiʹǩid, puäʹlddem-muõri väʹlddempaaiʹǩid, kaammisueiʹnnčuõppâmpaaiʹǩid da jeeʹjjelkâʹccempaaiʹǩid.