Äʹrbbvuõđlaž jieʹllemvueʹjj

Sääʹm äʹrbbvuõđlaž jieʹllemvuõʹjjid vuâđđõõvvi jieʹllemnääʹll lij pâi leämmaž ǩidd veiddsõs äʹrbbvuuʹdi ǩeâllʼjeeinalla âânnmõõžžâst. Säʹmmlaid da sij äʹrbbvuõđlaž jieʹllemvuõʹjji harjjtummša jieʹllem-mäinnan lij leämmaž čõõđ aaiʹji luâđ ǩeâllʼjeei âânnmõš, luâtt da jânnam lie leämmaž säʹmmlai jeäʹlteeʹjen. Säʹmmlai äʹrbbvuõđlaž jieʹllemvueʹjj lie puäʒʒhåidd, kueʹllšeellmõš, mieʹcstummuš, luâttouddsi uussmõš da noorrmõš, sääʹmǩiõtt-tuâjj da uuʹcces mäddtääll di täi ânnʼjõžäiggsaž haʹrjjtemnääʹl. Äʹrbbvuõđlaž jieʹllemvueʹjj lie vuâđđan sääʹmkulttuurâst. Jieʹllemvueʹjj tuõʹllʼje sääʹmǩiõl, sääʹmkulttuur, sääʹm luâttkõskkvuõđ da säʹmmlai äʹrbbvuõđlaž teâđ di seʹrdde tõiʹd puõlvvõõǥǥâst nobba. Tiõttum jieʹllemvuâkka da voudda jiiʹjjesnallšem sääʹmǩiõl teeʹrm di äʹrbbvuõđlaž teâtt lie jieʹllemvueʹjj harjjtem mieʹldd aktiivlaž âânnmõõžžâst seeilteeʹl kulttuur jieʹllemviõkksen. Äʹrbbvuõđlaž sääʹmjieʹllemvuõʹjjin puäʒʒhåidd õinn-i toiʹmmai õhttân sääʹmkulttuur kaallšõs vuâđđǩeäʹdǧǧen taʹrjjeeʹl kaallšõs ǩiõllareena lââʹssen materiaal jm. pihttsid, ǩiõtt-tuâjaid da porrmõškulttuuʹre.